ГIУМАРИЛ БАТИРАЙ «ДИЦА КЕЧI АХIУЛААН». Мух1амадова Гулишат, Мах1ачхъала шагьаралъул 35 школа
АВАР АДАБИЯТ 10 КЛАСС
11.04.2020 сон.
ТЕМА: ГIУМАРИЛ БАТИРАЙ
«ДИЦА КЕЧI АХIУЛААН»
- «Дица кечI ахIулаан» абураб ГIумарил Батирайил кIечI цIале ва тетрадазда гьал суалазе жаваб хъвай. (жаваб хъвазе бегьула коч1ол мухъаздалъунги)
- Суалал:
- Жиндир кинаб заман букIанилан хъвалеб бугеб авторас кочIолъ?
- КечI ахIаралъухъ кинаб гIакIа бахъараб гьесухъа?
- Авторасул кинаб анищ бугеб?
- КочIолъ кьун ругел риторикиял суалал хъвай тетрадалда (1-2 мисал).
Рич1ч1уларел раг1абазе баян:
Г1ак1а – штраф,
Бегавул - старшина аула,
Михир (мохрода) – каменный каток (на каменном катке),
Бугъа – бык, бугай,
Чагур – чонгур (струнный музыкальный инструмент).
«ДИЦА КЕЧI АХIУЛААН»
Дирги букIана заман
Бокьухъин кечI ахIулеб,
ГIатIлас чиллайги ретIун,
Чагурги накалда лъун,
Борхатаб тIохда бугеб
Мохрода тIадги кIусун,
ГIолохъаби гурараб
ГодекIанив гIодов чIун.
Дица ахIанщинаб кечI
Квеш букIун жамагIаталъ,
ГIакIадуянги рахъун,
Хъун рехана дир оцал.
Дун гIолохъанал соназ
ГIакIадай гьедин рахъун
ГIанчIаб гIакдал лъугьараб
Анлъабго бугъа хъуна.
РекIей гьебги захIмалъун,
ЯхI гьабизе кIвечIого,
ТIадагьго гали бахъун,
Вахъана годекIанив.
Габур халатаб чагур
Гаргадизе гьабуна:
«Паналъаяб дуниял,
Гьаб щиб инжитаб заман:
Айгъир русснада кIочон,
КIалцIи хIамузе балеб?!
ТIехьалда расен гIадав,
Расги гIайиб гьечIев дун
Ясал цIакъал улбузе,
Унго, щай вокьуларев?
ХIурахъезул жамагIат,
Жаваб буго къваригIун:
Зодил малаик гIадав,
Мунагьго лъачIев дунгун
Лъудби берцинал росал
Рокьукъго щай рукIунел?
Паналъаяб дуниял!
ДигIба лъилгун гьабилеб?
Арал къоял къваригIун,
Къеркьезейищ лъугьинев?
Къадиясда аскIове
Эмен цIехонищ инеев?
Эмен гьенив ватилищ,
ТалихI къарав бесдалав?
БотIрода расгIан гIемер
ГIакIаде оцал анищ,
ХIурахъа судиязе
Санайил лъаб-лъаб кьезе»
ГодекIаниб пахруго
Гьединаб кечI ахIигун,
КочIода гIакIа лъуна
ГIорцIарал бегавулаз.
Барахщун гIарз бахъун щай,-
ГIодоб тIамун хъве абе
ГIанчIаб гIакдал хутIараб
Ахирисеб дир баси.
