ФАЗУ ГIАЛИЕВА - 85 сон тIубаялде Гъизилюрт шагьаралда тIобитIараб байрам.

Гъизилюрт шагьаралъул рахьдал мац1алъул муг1алимзабазул къиматай гьалмагъ    поэтесса Залму Батыровалъ цо пуланай шаг1иралъул х1акъалъулъ гьадин хъвалеб буго:

«Г1ебса к1ич1ун ч1варай ч1инч1у берцинай,

Ч1артил букъаниги, гурде рекъолей,

Мах1мудил сариназ, Сафол куч1дуца

Каранда бакараб ц1а свине теч1ей.

Гьудуласул гъасде рохел бач1ани

Кунелъуб квенги тун баркизе уней.

Тушманасул рокъоб къварилъи ккани

Г1одун гуронани, йохизе лъач1ей.

Бахъараб хвалченги, т1огьол квац1иги

Кодоса г1умруялъ г1одой рехич1ей».

Маг1арулазда бицинч1ониги бич1ч1ун батила гьей шаг1ир Фазу Г1алиева йик1ин.Унго-унгояй маг1арулай, къалам бег1ерай, къадру борхатго ц1унарай Фазу Х1амзатовналъ исана т1убалаан 85 сон.  Нилъедаса ят1алъун заман баниги гьелъул гьунар ва коч1ол махщел к1оченаро кидаго. Фазул асараздасан пасих1го куч1дул ц1алиялъул   къец т1обит1ана 4 - 9 классалъул ц1алдохъабазда гьоркьоб 14 ноябралда Гъизилюрт шагьаралда.  Г1иц1го куч1дул ц1алиялъул  къец  гуреб,  коч1ол маг1на театралъул артистаз г1адин г1енеккаразухъе кодо-кодобе щвезабулеб тадбир ккана жакъа. Авар мац1алъул муг1алимзабаз ц1алдохъаби х1адурун ратана Фазул творчествоялде бугеб жидерго т1олабго рокьиги жаниб лъун. Тадбиралъул ахиралда ц1алдохъабазда бергьенлъи баркизе ва грамотаби кьезе щвана  шагьаралъул лъай кьолезе нухмалъулезул отделалъул начальник Г1абдулкъадир Мух1амадов. Баркала кьуна тадбир г1уц1арай рахьдал мац1азул методисталъе, ц1алдохъабазе ва муг1алимзабазе. Ват1ан бокьи, рахьдал мац1 бицин ва лъай щивасул т1адаб борч бук1ин рак1алде щвезабуна.  Жакъасеб тадбиралъ асар гьабич1ев цониги чи хут1ич1о г1ахьаллъаразда гьоркьов. «Муг1рузул закон», «ТIаде рахъа, умумул!» «Х1икматазул хан», «Эбелалъул хъах1аб шал» ва гьел гурел г1емерал асарал накъищаллъун рик1ун ругоан ц1алдохъабазул рек1елъ.