Рахьдал мацIалъул къо Хасавюрт шагьаралда

Хасавюрт шагьаралъул 5 школалда 11 февралалъ тIобитIана рахьдал мацIал кIодо гьариялъул байрам. Гьеб тадбиралда гIахьаллъи гьабуна магIарул ва лъарагI мацIазул мугIалимзабаз ва гьезул цIалдохъабаз.Тадбиралъул аслияб мурад букIана нилъерго умумуз гIадин цоцазул мацIазул адабги гьабун, жинди-жиндир мацI цIунизе тIадаб букIин баян гьаби.

Гьенире ахIун рукIана: Авар мацIалъул мугIалимзабазул ассоциациялъул председатель, «МагIарулай» журналалъул бетIерай редактор Баху МухIидинова, АхIмадов Б.Д. - Хасавюрт шагьаралъул администрациялъул нухмалъулесул заместитель, «ХIакъикъат» газеталъул мухбир Хъазанбиева Ш.Р.,  Россиялъул журналистазул союзалъул член Акгезов К.Ш., Гереева П.-«НасихIат» газеталъул редактор, «ЛъарагIлъи» газеталъул редактор Атаева Г.Б., Хасавюрт шагьаралъул  лъай кьеялъул управлениялъул рахьдал мацIалъул мугIалимзабазул куратор Рашидова А.А. ,Керимова М.М.-шагьаралъул лъай кьеялъул управлениялъул нухмалъулесул заместитель, Дагъистаналъул мустахIикъал артистал  Шамиль Ханакаев ва Латип Шаипов, КъурамухIамадова З.З.- Расул ХIамзатовасул цIаралда бугеб библиотекаялъул  бетIерай библиотекарь, ГIабдулгIазизова ГI.М.- «Спартак» культураялъул кIалгIаялъул  нухмалъулесул заместитель.