Риидалил ракlалдещвеял
КIиго сордо-къо къваригIана гьаб МакьастIа бараб заман макьуйищ яги хIакъикъатищ букIарабали бичIчIизе. МагIарул гьаваялъги, сверухъ рукIарал лъикIал гIадамазги, берцинаб тIабигIаталъги хIайран гьаюна. Байрамкъоял къанагIатал ахиресел соназда тIолго магIарулазе исана лъабабилеб нухалда дандеруссин гIуцIарай МухIидинова Бахуе кьезин баркала цIакъго кIудияб. ХIукуматалъ гIарац кьун, тIадчагIаз харж кьун гьабулеб хIалтIи гьеб гуреблъиги бицине бокьун буго лъаларезда лъазе. Авар мацIалъул мугIалимзабазул ассоциация гIуцIаралдаса нахъе гьелъул нухмалъулей Баху МухIидиновалъул хIаракатчилъиялдалъун гьабураб хIалтIи цониги батIиял миллатазда гьоркьоб яги батIиял предметазул ассоциациязда гьабун бажарараб хIалтIи гуро. Авар мугIалимзабазул буго сайт кумекалъе батулеб, тIоритIула семинарал ва данделъиял, гIахьал гьабун тIоритIула тадбирал мацIалда хурхарал. КIудияб методикияб кумек щвана я интернеталда, я тIахьаздасан щвезе жо гьечIого рукIарал мугIалимзабазе.
Щиб тадбир тIобитIулеб бугониги гьелъул букIине ккола хасаб мурад, гIадада 500-600 гIанасев чи тIабигIаталде пайда гьечIого ахIуларелъул. 13-15 июлалда тIобитIараб дандеруссиналъе кьучI лъуна Авар мацIалъул мугIалимзабазул ассоциациялъул нухмалъулей Баху МухIидиновалъ. ТIоцебесеб мурад букIана МАГIАРУЛАЛ рукIин бихьизаби, гьезул къадар гуреб къуват. ЦIар рагIарал шагIирзаби, мацI цIунулел мугIалимзаби ва гьелъие квербакъулел хIакимзаби- киналго данде ахIун рукIана. Дандбана мацI цIуниялъе гIоларого ругел шартIал, гьабуна лъагIалица мугIалимзабазул хIалтIул хIасилал, гьелдаго цадахъ хIухьбахъиги ккана. РакIалде щвезабуна умуммуз гьабулеб букIараб квен. Чанги берцинаб тIагIам кIалдиб лъуна батIи-батIиял мухъаз хIадурараб. Цере рахъун мугIалимзабазул къокъабаз рихьизаруна цересел, гьанже тIагIиналда хIинкъи бугел гIадатал. БацIцIадаб магIарул каламалъ кIалъалеб бугила кколеб букIана тIолабго МакьастIа байданалда бижанщинаб тIегь-хер. ТIасан роржунел цIумаз гурони берцинлъи босулеб букIинчIеб тIогьолаб авлахъалда тIад чIараб хIетIеялъухъ, тIурал тIугьдузухъ ва ракIарал даруял хурдузухъ тIаса лъугьаян гьаричIого хутIана.
Гьанибго бицун тела хундерица гьалбал къабул гьариялъулги. Кванил нигIматалги, кочIол бакъаналги, къваригIарасе гьобол рикIкIун рукъги хIадурун ратарал гьайбатал магIарулал, нужее сахлъигун рохел!!!
