Расул Х1амзатов "Къункъраби". Мух1амадх1ажиева Мадина, Хасавюрт шагьаралъул 3 Гимназия
Расул Х1амзатов
(1923-2003)
Къункъраби
Дида ккола рагъда камурал васал
Кирго рукъун гьеч1ин, къанабакь лъеч1ин
Муг1рул тун рик1к1ада хъах1ил зобазда
Хъах1ал къункърабазде руссун ратилин.
Гьел гьанжелъизег1ан гьаркьахинаго
Гьава къот1ун руго т1авап гьабулел.
Гьелъ гурищ къункъраби роржунеб мехалъ,
Къваридго зобазухъ балагьулел нилъ?
Унеб буго боржун свакараб къокъа,-
Дир къайицадахъал, вацал, г1агарлъи.
Гьезул чит1иралъулъ буго цо манзил,-
Гьеб батизе буго дие тараб бак1.
Дунги воржун ина къо бач1арабго,
Къункърабазул т1елгун дове рик1к1аде.
Гьезул мац1алъ дица ракьалда тарал
Рокьулел чаг1азул ах1ила ц1арал…
Дида ккола рагъда камурал васал
Кирго рукъун гьеч1ин, къаникь лъун гьеч1ин,
Муг1рул тун рик1к1ада хъах1ил зобазда
Хъах1ал къункърабазде руссун ратилин.
