"...Хварал мацIал руго чIаго гьарулел, нилъеца чIагояб чIвалеб буго гьаб..."

     Ахирал анкьаз авар мац1алда сверухъ багъарараб роц1инч1еб ах1вал-х1алалъ рах1ат хвезабун буго киназулго. Цин т1аде журан, цинги т1аса рахъизе ругила мац1 лъазабиялъе рихьизарурал саг1талилан гьанисан-дорасан щурун раг1улел харбал рек1еда  бак1лъарал муг1алимзабазул г1емерал суалал ва к1удияб рак1хвей бук1ана. Данлъелъаразухъги г1енеккун, гьезул рах1атхвейги бащад бикьун, Ассоциациялъул нухмалъулей Баху Шамиловналъ муг1алимзабазул к1вар буссинабуна Россиялъул лъай кьеялъул рахъалъ бугеб закон хвезабулеб бук1иналде. Гьеб законалъул 14 статьяялда бихьизабухъе, мац1алда сверухъ бугеб гьеб ах1вал-х1ал нилъер ихтиярал хвезарилъун кколеб буго: Пункт 4."Граждане Российской Федерации имеют право на получение дошкольного, начального общего и основного общего образования на родном языке из числа языков народов Российской Федерации, а также право на изучение родного языка из числа языков народов Российской Федерации в пределах возможностей, предоставляемых системой образования, в порядке, установленном законодательством об образовании. Реализация указанных прав обеспечивается созданием необходимого числа соответствующих образовательных организаций, классов, групп, а также условий для их функционирования. Преподавание и изучение родного языка из числа языков народов Российской Федерации в рамках имеющих государственную аккредитацию образовательных программ осуществляются в соответствии с федеральными государственными образовательными стандартами, образовательными стандартами."

   Гьелда т1адеги, гьебго законалъул 14 статьяялъе т1адеги кьолеб баяналда хъвалеб буго мац1азул х1акъалъулъ законалъул масъалабазул цояб кколила: "Сохранение и приумножение национальных и национально-культурных традиций народов, населяющих нашу страну, с помощью использования национальных, в том числе государственных, языков республик в составе Российской Федерации." (Источник: http://zakonobobrazovanii.ru/glava-2/statya-14).
  Журналал ц1езариялда сверухъги роц1инч1ел суалал рук1иналде к1вар кьуна. Х1исаб гьабеха, Буйнакск, Каспийск шагьаразда журналал ц1идасан хъвазе т1амун раг1ула, халгьабизе рач1ине ругездаса х1инкъун. Жидерго наслу мац1ги ц1арги гьеч1ого хут1изехъин ругин абуралдаса мах1ниги х1инкъулел гьеч1о. 

   Хунзахъ районалда киналго школал 2-абилеб ц1алул планалде рачанин абидал, хадуб бицунеб жо т1убанго бич1ч1улеб бук1инч1о. Хунзахъ район! Расулил, Ц1адаса Х1амзатил, Фазул, Бакьагьеч1иса Тажудинил ва цогидал г1емерал, цо район гуреб, т1олго Дагъистанго дунялалда раг1изабурал гьунарчаг1азул Ват1ан! Вук1араванищан дов мунагьал чураяв Расул ч1аго, школалъул ц1алул планалали киса гурин хисулел, жиндерго планалцин дос абухъе рачинаан.    Щайха руц1ц1ун ч1ун ругел х1акимзаби, хъвадарухъаби, нилъер  театралъул нухмалъулел, г1елмиял х1алт1ухъаби, идараби, цогидазул бицинарин??? 
  Лъица ц1ализе хъвалел ругел куч1дул, лъие х1адурулел артистаз спектаклал, г1алимзабаз ц1ех-рехги, дибирзабаз ваг1за - насих1атги лъие гьабизе ккезе бугеб? Бит1араб бук1ун буго Расулил: "Гьедин батанани, дун маг1арулазул бищун ахирияв поэтищ кколев?" абураб суал.

    Бахиллъизе бач1ана Татарстаналъул халкъалда: жидерго халкъалъул, мац1алъул, аралъул ва бук1иниселъул гьез гьабулеб т1алабги ургъелги раг1араб мехалда. Лъабазаргоялдасаги ц1ик1к1ун мажгит бугила Татарстаналдаян бицана Баху Шамиловналъ, рузманкъоялъ киналго мажгитазда мац1алъул х1акъалъулъ ваг1за гьабизе бихьизабун бугила гьезул муфтияс. Щиб гьелдалъун абизе бокьун бугеб? Нилъер гьездаса къарал гьеч1о т1адехун рехсарал киналго идарабазул г1адамалги г1алимзабиги.  Цоцазде т1амун теялъ бугилан ккола иш хвезабун. Щай цадахъ рахъунарел, цолъиялъул къуваталъул нилъее бицине ккеларин ккола. Лъиданиги бич1ч1улеб гьеч1о щай гьоркьосан к1анц1ун рач1ун, ракъарал хъурмуз хъорсол ц1ц1е г1адин, гьаб мац1ги миллатги ц1ац1алеб бугебали. Щай бахъулеб Дагъистаналъул тарих, Дагъистаналъул г1адатал ва маданиятал малъулеб дарс? Гьеч1ищ мац1-гьеч1о миллат. Миллаталда цадахъго т1аг1уна гьелъул тарихги маданияб рахъги. Х1исаб гьабеха, умумул, кире нужеца нужерго лъимал рехулел ругелали... Метерисеб къоялъ нужерго адаб гьез тедалги, дандч1варав имг1аласда хьолбохъан индалги, херлъидал нужгоги к1к1алахъе рехидал кант1изе ч1ун ратила.

  Цох1о минуталъги бахиллъиларо гьури пура-пуралъуре сумал г1адин росун унел т1адчаг1азул хъулухъалдаги багьаяб къохьол креслоялдаги. Цониги чиясда к1ун гьеч1о щиб бицунев чи мунан дов мац1 лъазабизе кколарин школалдаян цеве вахъарав "ц1одорида". "Жиндиего чед гьабуларес чидае мучари гьабуларин"  абураб нилъерго умумузул кициялъул роцаде ккола ахирги гьединал. Умумузе бокьун гьеч1ила, лъимадуца инкар гьабунилан абулел г1ахьуч1алги реч1ч1ула цо-цо гьоркьо-гьокьор. Тубх1ат Зургьаловалъ абухъе, дуе математикайищ физкультурайищ бокьилеб абунги ц1ехе доб лъимералда. 

 Лъик1 гьеч1о, х1урматиял маг1арулал, цох1о маг1арулазул гуреб, т1олго миллатазул иш. Сарат Мух1умаевалъ бицаралъги гьабуна рек1ее асар: "Ингилис мац1 лъазабуларогоян жиндего рагъулел эбел-инсуда васас абун бугила, гьал г1адамазул цонигияс жиндир мац1 гьеч1ин лъазабулеб, жинца азулаб щайзе лъазабизе кколеб абун...

    "Лъималаз пикру гьабулеб бугила г1урус мац1аялда, - ян бицана жиндирго к1алъаялда Мурад Кураевас,-маг1арул мац1алда пикру гьаби цебет1езабизе ккани,  лъималазул раг1абазул нахърател бечед гьабиялде к1вар буссинабизе ккола", - ян абурал раг1абаздаса хадуб данделъаразул пикраби ц1идасанго жидерго х1алт1ухъеги ц1алдохъабазухъеги рачана...

  Рек1ее хинаб божилъиялъул асар лъугьинабуна Баху Шамиловналъ Лъайкьеялъул Министерствоялъул рахъалъан Гъуниб т1обит1араб авар мац1алъул учительзабазул I слеталъул г1ахьалчаг1азе - командабазе кьурал дипломаз.  

I бак1- Болъихъ район

II бак1- Каспийск шагьар, Унсоколо район

III бак1- Казбек район, Хасавюрт, ТУНО.
  Ахиралдаги данделъаразул х1укму ккана т1адчаг1азде мац1алда сверухъ бугеб суалалда т1асан  рагьараб кагъат хъвазе, гьелдаго цадахъ киналго миллатал цолъун къват1ире рахъине. Гьабулеб бит1аги, бич1ч1енгун дандч1ваги!