МагIарулазде ХИТIаб

Дагъистаналъул лъай кьеялъул ва г1елмабазул Министерствоялъул х1алт1ухъабазде, Районазул лъай кьеялъул нухмалъиялъул бут1рузде ва х1алт1ухъабазде, Школазул директорзабазде ва муг1алимзабазде, х1алт1ухъабазде, ц1алдохъабазул умумузде, умумузул комитетазде, киналго маг1арулазде ХИТ1АБ
  Маг1арул аза-азар соназ умумуз ц1унун нилъехъе щвараб рух1ияб, г1амалияб, адабияб, маданияб, миллияб хазинаялъе, маг1арул мац1алъе, т1аг1иналъул х1инкъи бук1иналда бан, гьел нилъер лъималазги , хассго лъималазул лъималазги бицунеб гьеч1олъиялда бан, маг1арул т1ахьал, казиятал, журналал ц1алулел, маг1арул радиоялъухъ г1енеккулел дагьлъиялда бан, маг1арул мац1 х1ажатал факультетазде лъугьунел дагьлъиялда бан, маг1арул г1адатги, г1амалги, х1атта динги чучлъизе ва лъуг1изе х1алт1и гьабулел балъгоял къуватал рук1инги х1исабалде босун, ц1акъ к1удияб гьари буго, щуабилеб классазде щвезег1ан киналго предметал маг1арул мац1азда кьолел программабазде т1ад руссин т1алаб гьабеян. Щивас жив вугеб бак1алда, дида бараб жоги щиб бук1инебан ч1еч1ого, к1ван щинаб гьабе маг1арул мац1 лъималазда лъаялъе квербакъи гьабизе. Маг1арул районазул школал, байбихьул классазда маг1арул мац1азда цох1о дарс гурони кьоларел программабазде рач1ин ккола к1удияб балагь. Гьелдаса рорч1изе кумек ва квербакъи гьабе щивас. Маг1арул ях1ги, мах1ги, бугев щинав маг1арулав, жакъа х1ажалъи ккараб мехалъ рахьдал мац1алъе кумекалъе ватулев гьеч1они, мун ккола умумузул, хассго маг1арул шаг1иразул, г1алимзабазул, ай маг1арул умумузул рух1ал инжит гьарулев чи. "Ургъел гьеч1олъи дуца ч1вазе бегьула дунял" -абун рак1 унтун хъвана Расул Х1амзатовас. Нилъеца жакъа ургъел гьеч1олъиялъ нилъерго мац1 ч1валеб буго, хадуб дунял ч1вазеги нахъе къаларо нилъ. Дир ах1и кинго кколаро г1урус мац1алдеги миллаталдеги данде ч1араб ах1илъун. Гьелъул г1аксалда, маг1арул мац1 цин лъик1 лъани, г1урус мац1 лъазабизеги кумек бук1уна. Маг1арул мац1алъул г1алимзаби, хъвадарухъаби, шаг1ирал, мухбирал , журналистал, хъулухъчаг1и, рач1а цадахъ цолъун къеркьезе! Гьаб гуро дир ах1и, гьаб буго  киналго маг1арул мац1ги, ц1арги, маг1арулазул цебет1ейги, нилъер хирияб Ват1ан, Дагъистанги бокьулел щиназул ах1и! Бегьулеблъун батани, Аллагьасе г1оло ва нилъерго умумузул рух1азе г1оло жаваб гьабе, к1варас к1вараб гьабун раг1удалъун ишалдалъун, цадахъ рахъиналдалъун. "Надиршагь" нилъеде т1аде жакъа вач1ун вуго! Бихьизабе нилъерго ях1ги, бах1арчилъиги. Кумек гьабе кьижарал, сундулго агъаз гьеч1ел умумул рорч1изаризе! Аллагьас нилъер рит1ухъаб къеркьеялъе кумек гьабеги! Амин!

Шамил Мух1идинов