"Мацӏ гьечӏони-гьечӏо миллат". Сагӏидова Сиянат

Щибаб санайил т1обит1ула Хасавюрт шагьаралда Шималияб Кавказалъул Федералияб округалъул олимпиада. Гьенир г1ахьаллъула Северияб Осетия-Аланиялъул, Чачаназул, Ингушетиялъул, Ставрополалъул рахъалъул, Кабардаялъул, Карачаево-Черкесиялъул, Дагъистаналъул ц1алдохъаби.
Гьез жидерго лъай ва бажари борцине бук1ана математика, г1урус ва ингилис мац1ал, химия, обществознание г1адал предметазда сверухъ. Олимпиадаялда г1ахьаллъулезул къадар г1ага-шагарго к1инусго чиясде бахараб бук1ана. Гьелда бан, марталъул 26-27-28 къоял олимпиада жидехъ т1обит1изе бугел 2 ва 3 Гимназиялъул нухмалъулезе ва х1алт1ухъабазе х1алуцарал рук1ана.
 Бат1и-бат1иял рук1ана  жиб-жиб идараялъе, жив-жив нухмалъулесегун г1адатияв х1алт1ухъанасе кьурал т1адкъаял, амма масъала киназулго бук1ана цо: т1адег1анаб даражаялда олимпиада т1обит1и ва гьебго даражаялда гьалбазе Дагъистанги гьелъул рук1а-рахъинги рагьи.
 Гьединаб масъала бук1ана 3 гимназиялде Дагъистаналъул бок1он къач1азе т1адкъарал Хасавюрт шагьаралъул бат1и- бат1иял миллатазул учительзабазулги. Цебесеб къоялъго байбихьана лъараг1азги, даргиязги, лезгиязги, чачаназги, маг1арулазги, цадахъ лъугьун, Дагъистаналъул миллияб хаслъи рагьулеб бок1он къач1азе. Умумузул цебесеб рук1а-рахъин, маг1ишат-яшав рагьулеб г1емераб т1аг1ел-г1уч1ги, рет1ел-т1ехги, квен-т1ехги рагьулеб бок1оналъул: "Мац1 гьеч1они- гьеч1о миллат!" абураб ах1и бук1ана. Бук1ана гьединго жиб-жиб миллаталъ жидерго мац1алда хурхараб литератураги, ц1алул т1ахьалги, баннералги х1адурун. Миллияб рет1елгун ругел ц1алдохъабазги муг1алимзабазги бат1ияб гугьар кьолеб бук1ана тадбиралъеги. Хасавюрт шагьаралъул Лъай кьеялъул нухмалъулев Руслан Молланович Ибрагьимовгун тадбиралде щвана Хасавюрт шагьаралъул нухмалъулев Зайнудин Дадабегович Охъмазовги. "Рокъоб эбел-инсуца бицине, малъизе ккола  лъималазда  мац1",-ян абуна гьес жиндирго к1алъаялъулъ ва киназего баркала загьир гьабуна жидерго миллатги мац1ги ц1унун гьабулеб х1алт1ухъ. Бат1аго ц1акъ киназго к1вар кьолеб бук1ана Казбек районалъул Гуни росулъа ц1улал устар Багьавудинил махщел -бажариялде. Умумузул рук1а-рахъин рагьулел т1аг1ел-г1уч1ал гурелги, ц1улал рук1иналда божизе зах1матал бат1и- бат1иял интересал жал рук1ана устарас выставкаялде рач1ун. Гьединго жиндирго умумузул цебесеб къайи бач1ана тадбиралде 12 школалъул авар мац1алъул муг1алим Шахрудинова Майсарат Мух1амадовналъги, 19 школалъул авар мац1алъул муг1алим Муртазг1алиева Т1авусай Г1изудиновналъги. Гьезие рак1-рак1алъулаб баркала загьир гьабизе бокьун буго. Баркалаялъе мустах1икъал руго гьединго гьеб тадбир т1адег1анаб даражаялда иналъе нухмалъи гьабурал  №3 Гимназиялъул директор Гъолоев Ризван Аливкаевич, Хасавюрт шагьаралъул лъай кьеялъул  бет1ерай специалист  Рашидова Г1азра Ах1мадовна ва гьезул нухмалъиялда гъоркь рак1 унтун х1алт1и цебе бачарал муг1алимзаби: 3 Гимназиялъул авар мац1алъул муг1алимзаби: Г1алиева Къурмагъиз Г1умахановна, Саг1идова Сиянат Тимуровна, Насрудинова Марина Мух1амадовна, Сайпулаева Зайгьарат Къасумовна, Мух1амадх1ажиева Мадина Г1айнудиновна, Мух1амадсулт1анова Марина Шигьавдиновна, 17 школалъул муг1алимал Бадрудинова Заира Тажудиновна, Гъазимух1амадова Рукъият Алхуватовна, 10 школалъул муг1алим Х1асанханова Зайнаб Насрудиновна. Гьалбазул разиял гьурмазги, рахъулел г1емерал суратазги, кьолел суалазги, баркалаязги бицунеб бук1ана гьабураб х1алт1ул х1асил лъик1аб ккеялъул. Аллагь разилъаги киназдаго!
Хабар лъик1аб раг1аги.
                                                                                            Саг1идова Сиянат Тимуровна,
                                                                       Хасавюрт шагьарлъул 3 гимназиялъул муг1алим