ГIелмияб конференция
Махlачхъалаялда, 19 февралалда, Расул Хlамзатовасул цlаралда бугеб миллияб библиотекаялда тlобитlана гlелмияб А. А. Тахо-Годил цlаралда бугеб институталъулгун цадахъаб Рахьдал мацlалъул къоялде гьабулеб конференция. Гьениб гlахьаллъи гьабуна районаздаса рачlарал батlи-батlиял мацlазул учительзабаз. Конференция бачунеб букlана заманаялъ институталда директорасул бакlалда тарай профессор Меседу Идрисовнаялъ.
Цин рагlи кьуна Махlачхъалаялъул 53 школалъул цlалдохъабазе. Гьез батlи-батlиял мацlазда рикlкlарал кучlдузги берцинаб кьурдиялъги тlаде рачlаразе лъикlаб асар гьабуна.
Мацlазул школазда бугеб ахlвал-хlалалъулги ФГОСалда рекъон цlиял рачlарал цlалул тlахьазулги бицана кlалъазе цере рахъарал рахьдал мацlазул Ассоциациялъул нухмалъулей
11 гимназиялъул директор Зугьра Яхъяевналъги, ДГУялъул мацlазул кафедраялъул заведующий Муса Расуловичасги, Тахо-Годил цlаралда бугеб гlелмияб институталъул рахьадал мацlазул секторалъул заведующий Хlайбула Сулеймановичасги ва цогидал мацlазул мугlалимзабазги. Бихьулеб букlана учительзабазул ракl унтулеб букlин къо бахъанагlан мацl лъаларел лъимал школалда гlемерлъулел рукlиналъ, «Дагъистаналъул литература» предмет хисун «Гlурус рахьдал мацl» абураб предмет бачlиналъги. Гьединго учительзабаз кlудияб баркала кьуна ФГОСалда рекъон цlиял цlалул тlахьал къватlире риччарал, гьезда тlад хlалтlарал авторазеги.
Конференциялъул хlасилалда рекъон, кватlичlого къватlибе биччазе буго учительзабазул докладал жанир ругеб мажмугlги.
Джамалова Эльмира.
