СагIид Габиев гьавуна бетIербахъиялъе къватIиве вахъарав гъалайчиясул хъизаналъе. Гьес жиндирго кучIдузулъ загьир гьабун буго халкъалда бугеб зулму-хIал, мискинзаби ахIулел руго тIекълъиялда данде къеркьезе, зулму тIаса рехизе.

АНИЩ

Огь, вукӀаравани дун,

Куркьбал гӀедераб хӀинчӀлъун,

Дагъистаналда тӀасан

ТӀавагьун воржинаан.

Дора чармил кьураби

Кьижун руго гӀасрабаз.

ГӀурччинаб харилъ мугӀрул

ГӀунун руго къарнабаз.

Дора, бецӀал парсазда

Сиртал рецӀцӀулел руго,

ЦӀорол тӀалабазулъан

ТӀугьдул гьимулел руго.

Рукъалъул къадада бан,

Батила доба хвалчен,

ХӀурул гъатги тӀад бигъун,

Гьудуласухъги чӀалгӀун.

Гьелъухъе воржинаан,

Куркьбаца тӀаса лъухьун,

Кинабго хӀур гьелдаса

Берцинго бацӀцӀинаан.

Дир кваркьи лълъурилаан

Чагуралъул чӀвабзада,

Гьезул цересел гьаркьал

Гьоркьор къотӀунгутӀизе.

Гьезул хӀайранал бакънал

КъотӀичӀого рагӀизе,

БахӀарзазул кучӀдуца

Каранда цӀа бакизе.

МУРАД

Абула, чӀегӀергъеду

ЧӀчӀвагъдолилан ричӀчӀалъе,

Гьелъ нилъер мугӀрул, гӀалхал

ГӀаздаца рахчун ругин.

НакӀкӀазулъ росун ругин

Нилъер расалъабиги,

БахӀарзалги гьаричӀин

Гьаб ракьалда кидаго.

Гьеб битӀараб. РичӀчӀалъе

ЧӀчӀвагъдола чӀегӀергъеду,

- Нилъер мугӀрул ва гӀалхал

ГӀаздаца руго рахчун.

ГӀатӀидал расалъаби

Руго накӀкӀулъ тӀупун лъун,

Амма нилъер ракьалда

Руго гӀемер бахӀарзал.

НакӀкӀал тӀагӀине руго,

ГӀазу биине буго,

Бергьенлъиялъул байрахъ

Бакълъун кенчӀезе буго.

Релълъарал макъалаби:

Пикру загьир гьабизе

Личный кабинет

Машгьурал макъалаби

Нилъер аслияб масъала ккола авар мацI ва адабият малъиялъул кIвар бугел суалазде тIолго жамгIияталъулго кIвар буссинаби, школазда миллиял мацIазда филологияб лъайкьеялда хурхарал батIи -батIиял суалал рагьизе рес кьейи, гьел цойидеги гьарун, жамгIияталъулго пикру хIисабалда, чIванкъотIарал, лъутIа- къотIарал хIукмаби рахъиялъул мурадалда, нилъер республикаялъул нухмалъулезда цере лъей. Ассоциациялъул кIиабилеб масъала ккола авар мацIалъул ва адабияталъул мугIалимзабазе методикияб кумек щвезаби, цоцазул махщалил бажариялъул ва хIалтIул хIалбихьиялъул цоцае бицине рес кьей, гьединго, сайт гьоркьоб ккун, цоцазулгун профессионалияб бухьен гьаби ва цогидал сетазул къокъабазулгун бухьен гьабизе рес кьей.