ЦIех-рех
КъваригIун бугищ рахьдал мацIалда ЕГЭ?

"Бищун лъикIав рахьдал мацIалъул мугIалим- 2021" къецалъул республикаялъул этап

Гьал къоязда х1асилал гьаруна щибаб санайил т1обит1улеб «Бищун лъик1ав рахьдал мац1алъул учитель» абураб конкурсалъул Республикаялъулаб этапалъул.

11-12 февралалда т1обит1араб конкурсалъул заочный туралда жюриялъ конкурсалда г1ахьаллъизе заякаби рит1арав 50 рахьдал мац1алъул учителасда гьоркьоса очный туралде виччан вуго 30 учитель. Гьезда гьоркьосан конкурсалда г1ахьаллъиялъе завкаби рит1арал 18 маг1арул мац1алъул учительзабазул 10 виччан вуго 16-19 марталда т1обит1араб очный туралда г1ахьаллъизе. Конкурс т1обит1улеб бук1ана Мах1ачхъала шагьарлъул 11 гимназиялда. Т1оцесеб къоялъ муг1алимзабаз кьолеб бук1ана жидецаго бищараб темаялда т1асан дарс. К1иабилеб къоялъ мастер – класс бихьизабиялъул къецазде виччарав 10 муг1алимасда гьоркьоса ункъояв маг1арул мац1алъул учитель вук1ана. Мастер классалдаса хадур финалалде т1аса вищарав 5 муг1алимасул лъабгояй йик1ана Гъизилюрт районалъул, Буйнакск районалъул ва Хунзахъ районалъул маг1арул мац1алъул муг1алимзаби, гьединго цо лъараг1, цо чачан мац1алъул муг1алимзаби. Финалалда муг1алимзабаз «Авар мац1алъул ва адабияталъул дарсазул даража борхизабиялъе нухал» абураб темаялда т1асан лекция ц1ализе бук1ана.

Г1аммаб жюриялъул х1асилазда рекъон, «Бищун лъик1ав рахьдал мац1алъул учитель-2021» конкурсалда т1оцебесеб бак1алъе мустах1икълъана Хунзахъ районалъул Уздал росулъа Х1усейнова Саида, к1иабилеб бак1 кьуна Хасавюрт шагьаралъул 15 школалъул чачан мац1алъул муг1алим Орзумиева Раисае ва лъабабилеб бак1 гьоркьоб бикьана Гъизилюрт шагьаралъул 2 школалъул авар мац1алъул муг1алим Закаряева Пат1иматица, Буйнакск районалъул Ч1ик1аб росулъа мац1алъул муг1алим Г1амирханова Заираца ва Буйнакс районалъул Гъоркьа Гъазданищиб 3 школалъул лъараг1 мац1алъул муг1алим Зубайдинова Мадинаца.

Г1аммаб жюриялда г1ахьалъи гьабурал Каспийск шагьаралъул авар мац1алъул муг1алим Зургьалова Пат1имат Башировналъ ва ДГПУ-ялъул Дагъистаналъул мац1ал лъазариялъул централъул директор, филологиял г1елмабазул кандидат, Дагъистаналъул мац1азул кафедраялъул доцент Нурмух1амадов Мух1амад Мух1амадсайгидовичас лъик1аб къимат кьуна муг1алимзабазул х1адуриялъе ва дарсазе.

Конкурсалъул х1асилал гьарулаго, Лъай кьеялъул министерствоялдаса вакил Шабанова Людмила Юрьевналъ берцинаб цебераг1иялдаса хадуб, Дагъистаналъул лъай цебет1езабиялъул институталъул филологияб кафедраялъул к1удияй преподаватель Юсупова Райх1анат Мух1амадовналда баркана «Дагъистаналъул лъайкьеялъул отличник» абураб х1урматияб ц1ар.

Газета гьоркьоб ккун, киналго маг1арул мац1алъул муг1алимзабазул рахъалдасан бокьун буго Райх1анат Мух1амадовналда баркизе, гьаризе чорхое сахлъи, жеги ч1ах1иял бергьенлъабигун шапакъатал!

Баркула киназдаго бергьенлъаби.

Миллатги мац1ги ц1унун бихьараб г1акъуба кирилъун хъваги!

Саг1идова Сиянат Тимуровна,

Хасавюрт шагьаралъул 3 гимназиялъул авар мац1алъул муг1алим

Пикру загьир гьабизе