Хасавюрталда авар мацIалъул мугIалимзабазул семинар

Каникулазул къоязда Хасавюрт шагьаралъул А. М. Сайтиевасул ц1аралда бугеб

2 Гимназиялда т1обит1ана шагьаралъул авар мац1алъул ва адабияталъул  муг1алимзабазул семинар. Семинар т1обит1улеб бук1ана «Халкъияб к1алзул гьунаралъул меседил мугьал» абураб темаялда. Семинар рагьана гимназиялъул авар мац1алъул ва адабияталъул муг1алимал Гунащева Сакинат Мух1амадовналъ ва Г1абдулкагирова Заира Мух1амадовналъ.

    Байбихьуда Г1абдулкагирова Заира Мух1амадовналъ муг1алимзабазда бицана авар мац1алъул ва адабияталъул дарсазда бат1и-бат1иял расандабазул къаг1идаби х1алт1изариялъул х1албихьиялъул. Заираца лъай-хъвай гьабураб синквейналъул къаг1идаги х1алт1изабун, муг1алимзабаз рихьизарурал раг1абазда т1асан г1уц1ана

бат1и- бат1иял синквейнал.

    Гунащева Сакинат Мух1амадовналъ семинаралъул г1ахьалчаг1азе халкъияб к1алзул асаралъул бугеб к1варалъул баян гьабун хадуб, муг1алимзабазе, к1иго къокъаялдеги рикьун, кицаби ва абиял кьуна дандразе.

  Гьелдаса хадуб берцинго семинар бачине цере рахъана ц1алдохъаби.

    Лъик1аб асар гьабуна лъималазул церерахъиназги: берцинго рик1к1ана халкъияб к1алзул гьунаралъул асараздаса кинидахъ куч1дул, кицаби, абиял, маг1арул шаг1ирзабазул  куч1дул, ах1ана маг1арул мац1алда куч1дул, рихьизаруна бат1и-бат1иял миллиял кьурдаби, киналго х1айран гьаруна ц1алдохъанасул къолода  бакъан бачине бугеб махщелалъги. Ц1алдохъабазда рет1араб бат1и-бат1ияб миллияб рет1елалъги, къач1араб миллияб бок1оналъги цо хасаб гугьарги хинлъиги кьолеб бук1ана семинаралъул г1ахьалчаг1азе.

   Ахиралда авар мац1алъул ва адабияталъул муг1алимал Гунащева Сакинат Мух1амадовналъ ва Г1абдулкагирова Заира Мух1амадовналъ ах1ана «Дир мурад» абураб кеч1.

   Данделъиялда г1ахьаллъарай шагьаралъул лъайкьеялъул бет1ерай специалист Ах1мадова Г1азра Ах1амадовналъ семинаралъе т1адег1анаб къиматги кьун, шагьаралъул лъайкьеялъул управлениялъул рахъалдасан, гьаюраб къо к1одо гьабун, баркалаялъул кагъат кьуна Хасавюрт шагьаралъул 3 Гимназиялъул авар мац1алъул муг1алим Г1алиева Къурмагъиз Г1умахановналъе маг1арул мац1 лъазабиялъе ва цебет1еялъе гьабураб г1емерал соназулаб х1алт1ухъ.

  К1алъазе рахъарал 3 Гимназиялъул авар мац1алъул муг1алим, авар мац1алъул муг1алимзабазул Ассоциациялъул сайталъул нухмалъулей  Саг1идова Сиянат Тимуровналъ ва шагьаралъул  авар мац1алъул муг1алимзабазул методикияб цолъиялъул нухмалъулей  5 школалъул муг1алим Мух1амадова Аслипат  Багьавдиновналъ лъик1аб къимат кьуна семиралъул х1алт1уе ва баркала загьир гьабуна семинаралда г1ахьаллъарал муг1алимзабазегун ц1алдохъабазе.

Ахиралда семинаралъул г1ахьалчаг1азе баркала загьир гьабураб хинаб к1алъай гьабуна  2 гимназиялъул директор Х1айдарбиев Халид Салвадиевачас, директорасул заместитель Зинина Лаура  Викторовналъ, методикияб цолъиялъул нухмалъулей Хозяева Зарема Х1амзатовналъ.

 Берцинаб гьоболъиялдаса разилъиги хинаб асарги х1ут1ана муг1алимзабазул рек1елъ семинаралдаса хадуб.

Лъик1аб раг1аги, лъик1аб бихьаги!

Саг1идова Сиянат Тимуровна,

3 Гимназиялъул авар мац1алъул муг1али