Баркула рахьдал мацIазул къо!

Хириял Дагъистаниял!

Рекlее г1агарал маг1арулал!

Рак1-рак1алъ баркула жакъасеб рахьдал мац1азул къо!

Гьаб мац1аль ах1ана х1айранал куч1дул,

Х1асратай эбелалъ дие кинидахъ.

Гьаб мац1алда гурищ инсуца кьурал

Г1умруялъул дарсал даим ч1агоял!

                  Шамай Хъазанбиева.

Дир г1агараб авар мац1! Бечедаб, гъваридаб, г1акъилаб, нус-нус соназ наслабаз наслабахъе кьун ирсалъе щвараб к1удияб бечелъи - маг1арул калам!

Рахьдал мац1алда к1алъалев чи раг1араб мехалъ рек1елъе цо бат1ияб хинлъи рещт1уна, гьев чиясдехунги цо бат1ияб рокьи , адаб- х1урмат бижула!Гьелъ инсан берцинлъизе ва т1адег1анлъизе гьавула!

«Гьеб рекъараб буго нилъер халкъалда,

Черхалда борчараб рачел кинигин».(Р .Х1.)

Авар мац1алъ хъвана нилъер к1удиял шаг1ирзабаз ва хъвадарухъабаз жидерго ссвин гьеч1ел асарал! Гьез дунялалдаго раг1изабуна авар калам, ц1вабзазда хъвана гьелъул ц1ар! Гьеб мац1алъ ах1ана Мах1мудица панаял рокьул саринал. Гьеб мац1алъулъ бессун буго нилъер халкъалъул бах1арчилъиги, къох1ехьейги, къвак1иги, ях1-намусги...Авар калам раг1идал нилъеда раг1ула г1едег1ун унел г1оразул хъудиги, лъаразул чил-чилиги, зобалазда т1авап гьабулел ц1умазул гьаркьалги... Цере ч1ола чармилал кьурабиги, гъваридал к1к1алалги, рорхатал муг1рулги...

Рак1алде щола иццухъан чвахулеб иццулги, ражигун хинк1азулги, мохмохаъулги мах1алги т1аг1амалги! Рахьдал мац1алъул гъварилъиги т1адег1анлъиги борцине цониги роцадул къуват г1еларо!

Ц1уне рахьдал мац1! Хвезе биччаге нилъер рух1ияб хазина!