“Шиг1рабазул саг1ат” Каспийскалда
“Дагъистаналъул ч1ух1и, такрарлъи гьеч1еб гьунаралъул шаг1ир, Дагъистаналъул халкъияй поэтесса ,Фазу Г1алиевалъул г1умруги кеч1ги цадахъ байбихьана, маг1арул сухъмахъазги коч1ол мухъазги к1удияб дунялалъул нухазде ячана, шаг1ирлъиялъул борхалъиялде яхинаюна…”. Гьединан хъвалеб буго Фазу Г1алиевалъул х1акъалъулъ “Х1акъикъат” журналалда Мух1амад Ах1мадовас. Унго-унгоги Фазу Г1алиевалъ нилъер адабияталда тана к1удияб лъалк1 ва гьейги гьелъул асаралги нилъеда кидаго к1очон тезе бегьуларо.
Фазул асаразул к1вар г1ун бач1унеб г1елалда лъазе ва бич1ч1изе ккейги мурадалде босун, 18 декабралда ,Каспийск шагьаралъул анлъабилеб школалда т1обит1ана “Шиг1рабазул саг1ат” абураб Фазу Г1алиевалъул творчествоялда т1асан г1уц1араб тадбир. Тадбир г1уц1ун бук1ана ва берцинго нухда бачана гьеб школалъул авар мац1алъул муг1алим, “Россиялъул бищун лъик1ав рахьдал мац1алъул муг1алим-2010” къецазда т1оцебесеб бак1 босарай, Дагъистан Республикаялъул нухмалъулесул гранталъул къецазда бергьенлъи босарай, Авар мац1 малъиялъул дискалъул автор, “Самоучитель аварского языка” абураб т1охьол автор Бечедова Хадижат Мух1амадовнаялъ. Тадбиралде гьоболлъухъ ах1ун рач1ун рук1ана: ИЯЛИ ДНЦ РАНалъул г1елмияй х1алт1ухъан, чанго соналъ Фазу Х1амзатовнаялъул кумекч1ужулъун х1алт1арай Мух1амадова Мариза, “Х1акъикъат” газеталъул мухбир, Мах1ачхъала шагьаралъул 11 гимназиялъул авар мац1алъул муг1алим Хъазанбиева Шамай, ДГПУялъул ФДФалъул студент Манапов Мух1амад ва Каспийск шагьаралъул т1оцебесеб школалъул авар мац1алъул муг1алим Хирамух1амадова Хадижат.
Тадбирги рагьун, т1аде рач1арал гьалбадерие баркалаги кьун ,Хадижат Бечедовалъ раг1и кьуна жиндирго ц1алдохъабазе.Гьез ц1акъ пасих1го ва берцинго рик1к1ана Фазу Г1алиевалъул куч1дул, рихьизаруна “Маг1арулазул нус” ва “Хъах1аб шал” абурал асаразда т1асан лъурал сценкаби. Балагьаразе ц1акъ лъик1аб асар гьабуна лъималазул церерахъиналъ. Рихьизаруна гьединго Фазу Г1алиевалъул х1акъалъулъ рахъарал фильмаздаса гьит1инал кескал, г1уц1ун бук1ана гьелъул т1ахьазул ва суратазул выставкаги.
Гьелдаса хадуб к1алъазе рахъана т1аде рач1арал гьалбал ва школалъул нухмалъулей Х1амзатова Мадина Таймазовна. Мариза Мух1амадовалъ бицана Фазу Г1алиевалъул творчествоялъул гуребги, кинай гьей г1адан х1исабалдаги йик1араялиги. Рицана гьелда хурхарал, г1умруялда жанир ккарал лъугьа-бахъиназул. Хадуй к1алъазе яхъарай Шамай Хъазанбиевалъ бицана Фазу Х1амзатовнаялъ авар адабияталда тараб к1удияб лъалк1алъул, гьелъул асарал гъваридаб маг1наялъул, г1адамал т1ад ургъизе т1амулел рук1иналъул ва ах1ана жийго гьит1инаб мехалъ хоралда ах1улеб бук1араб Фазу Г1алиевалъул “Ват1ан” абураб кеч1ги. Лъимал ц1акъ гъираялда г1енеккун рук1ана гьалбадерил к1алъаязухъ. Кьуна гьезие суалалаги.
Ахиралда школалъул нухмалъулей Мадина Таймазовнаялъ т1аде рач1арал гьалбадерие баркалаги кьун, бицана Хадижат Мух1амадовнаялъ школалда авар мац1 ва адабият цебет1еялда ва гьелдехун лъималазул гъира базабиялда хурхун ц1акъ к1удияб х1алт1и гьабулилан.
Тадбир ана ц1акъ пайдаяб , т1адег1анаб даражаялда . Бокьун буго к1удияб баркала загьир гьабизе Хадижат Бечедовалъе гьединаб берцинаб, пайда ц1ик1к1араб тадбир г1уц1аралъулъ ва нижее гьабураб лъик1аб гьоболлъиялъухъ. Аллагь разилъаги,гьабулелда баракат лъезабеги.
Мух1амад Манапов. ДГПУялъул ФДФалъул 2-б курсалъул студент.
